Fichas de obradoiros: CUNCHACHAPA

Nome: Obradoiros con chapas, Cunchachapa.
Motivación: As chapas son un interesante recurso material para diferentes obradoiros, creativos, lúdicos e artísticos.
Acción: Decorar chapas con cunchas ou outras cousa bonitas para facer equipas e para persoaliza-las nosas chapas.
Loxística: superficie plana para, espacio cómodo para manualidades.
Idade: A partir de 11 anos.

¿QUE PRECISAMOS?
chapas, cunchas, barra de silicona e pistola de silicona

¿E COMO SE FAI?
A primeira parte do obradoiro é igual ó obradoiro de Enchechapa de Chapaenchenta:
Buscamos unha mesiña e colocamos un xornal aberto á metade sobre a mesa para non manchar. Collémo-las chapas (mellor xa pintadas) e colocámolas coa parte interior cara arriba. Entrementres collémo-la pistola de silicona enchufámola e agardamos a que quenza un pouquiño (¡Ollo, que queima!). Coa pistola xa quente metémo-la barra de silicona e preparámonos para ir enchendo chapas.

IMPORTANTE: ¡¡antes de comezar a bota-la silicona, proba que a cuncha cabe dentro da chapa!!

É aconsellable botar silicona nunha chapa e pega-la cuncha nesa chapa de unha nunha (se metes silicona en varias chapas corres o risco de que cando vaias pegar as derradeiras chapas xa estea seca a silicona).
É mellor botar pouca silicona: abonda unha pouquiña para pega-la cuncha.

Nun par de minutos xa tes a túa chapa lista e persoalizada.
As equipas oficiais constan de alomenos 11 chapaxogadoras, todas metidiñas nun saquiño.


Tamén tes:
GARBACHAPA: uns garbanzos en vez de cunchas.
LANDRACHAPA: parte das landras en vez de cunchas.
PEREGRINOCHAPA: moedas de 1, 2 ou 5 centimos coa silueta da Catedral de Santiago.
DENTECHAPA: só se tes algún irmán ao lle estean a cae-los dentes (dentes arrincados non valen porque a violencia nunca trae nada bo nin tampouco é solución).
PEDRACHAPA: con pedriñas (na praia hainas preciosas ... ou pintadas).
... o que queiras inventar !!!

Fichas de obradoiros: ENCHECHAPA

Nome: Obradoiros con chapas, Enchechapa: Chapaenchenta, Chapucera e Masachapa.
Motivación: As chapas son un interesante recurso material para diferentes obradoiros,
creativos, lúdicos e artísticos.
Acción: Encher chapas con diferentes tipos de materiais: silicona, cera, masa de pan, plastilina, etc. Enchendo a chapa tamén podemos aproveitar para persoalizala.
Loxística: superficie plana, toma de corrente, espacio cómodo para manualidades, material para encher.
Idade: A partir de 9-10 anos.

CHAPAENCHENTA
¿QUE PRECISAMOS?
chapas, pistola (termocoladora) de silicona e barras de silicona transparente
¿E COMO SE FAI?
Buscamos unha mesiña e colocamos un xornal aberto sobre a mesa para non manchala.
Collemo-las chapas (mellor xa pintadas) e colocámolas coa parte interior cara arriba. Entrementres collemo-la pistola de silicona enchufámola e agradamos a que quenza un pouquiño (¡Ollo, que queima!). Coa pistola xa quente metémo-la barra de silicona e preparámonos para ir enchendo chapas. Non fai falla moita cantidade, pero iso é cuestión de gustos.

CHAPACERA
¿QUE PRECISAMOS?
Chapas, candeas e chisquiero ou mistos.
¿E COMO SE FAI?
Buscamos unha mesiña e colocamos un xornal aberto á metade sobre a mesa para non manchala.
Collemo-las chapas (mellor xa pintadas) e colocámolas coa parte interior cara arriba, deixando un pouco de espacio entre unha e outra. Acendémo-la candea e preparámola para que deixar cae-la cera dentro da chapa.
MASACHAPA
¿QUE PRECISAMOS?
Chapas, fariña, auga, sal, recipiente para amasar e forno.
¿E COMO SE FAI?
Con fariña, sal e auga facemos unha masa como se fose unha empanada (pregúntalle a un maior), as proporcións son as de sempre: a ollo. Se ves que non liga, mételle auga, se te pasas coa auga, máis fariña. É convinte que leven abondo sal para que se conserve. Lembra que con pouca masa (50 g de fariña) tes para moitísimas chapas. Cando xa teñas todo amasado, podes ir enchendo as chapas con masa. É imporante non encher toda a chapa porque logo a masa crece un pouco e non convén que a masa sobresaia da chapa: con encher ata a metade coa masa, abonda. Mételas chapas no forno uns 15-20 minutiños a temperatura media (175 ºC) e logo sácalas na bandexa do forno (¡Ollo, non as toques coa man que queiman!).

Fichas de xogos: O OLLO

Nome: O Ollo.
Motivación: Xogos sinxelos, ecolóxicos e divertidos. Cunha simple presiña de chapas pódese xogar a ben distintos xogos.
Tipo de xogo: Sesións de práctica de move-la chapa co dedo, práctica de precisión na potencia e dirección, xogo básico, campionato.
Loxística: Arremedamento do popular xogo homónimo con canicas.
Material: Xiz ou un pauciño para esgarabellar na terra. Pódese tamén xogar en caixas grandes, a modo de cadrilátero.
Idade: A partir de 5-8 anos.
Nº Xogadoras/es: 2-5

Un ollo ou pelota de rugbi trazada no chan e unha presa de chapas dentro.
Por turno cada xogador cunha presiña de chapas dende fóra proba a libera-las chapas presas batendo nelas e sacándoas do ollo.
As chapas que fiquen dentro fican presas.
Quen quede sen chapas queda sen chapas.
Quen libere máis chapas liberou máis chapas.

Fichas de xogos: BALONMÁN

Nome: Balonmán.
Motivación: Xogos sinxelos, ecolóxicos e divertidos. Cunha simple presiña de chapas pódese xogar a ben distintos xogos.
Tipo de xogo: Sesións de práctica de move-la chapa co dedo, práctica de precisión na potencia e dirección, xogo básico, campionato.
Loxística: Disposición de mesas ou taboleiros suficientes de modo que por parellas se poidan situar enfrontad@s.
Material: Superficies lisas suficientes (mesas ou taboleiros, non vale o chan! A mesa do profe é ideal). 14 chapas por parella (poden ser con peso).
Idade: A partir de 8 anos.
Nº Xogadoras/es: 2

7 chapas por equipa nun campo con dúas porterías.
A posición de inicio é as dúas equipas en na liña de fondo. A partir daquí debe mover de golpe limpo unha chapa de cada vez de xeito que:
1) avance sempre cara a canasta,
2) cada chapa que se desprace atravese a liña imaxinaria que se crea entre as outras dúas chapas (dá igual de que equipa) e a supere sen bater nelas.

Gaña quen mete máis chapas na portería contraria.
As chapas que saen fóra, fican fóra e non se contan nos movementos de avance.

Fichas de xogos: ENTRADA A CANASTA

Nome: Entrada a Canasta.
Motivación: Xogos sinxelos, ecolóxicos e divertidos. Cunha simple presiña de chapas pódese xogar a ben distintos xogos.
Tipo de xogo: Sesións de práctica de move-la chapa co dedo, práctica de precisión na potencia e dirección, xogo básico, campionato.
Loxística: Disposición de mesas ou taboleiros suficientes de modo que por parellas se poidan situar enfrontad@s @s xogadores facendo mutuamente de canasta e xogador por turnos.
Material: Superficies lisas suficientes (mesas ou taboleiros, non vale o chan! A mesa do profe é ideal). 3 chapas por parella.
Idade: A partir de 6-7 anos.
Nº Xogadores/as: 2

Póusanse maimiño e furabolos estirados sobre o canto dunha mesa (ou similar) ficando medianiño e pai-de-todos agochados cara abaixo. Est@ será a Canasta. No outro extremo, @ outr@ xogador dispón tres chapas en triángulo e bate nunha delas de xeito que se desprazan pola superficie.
A partir daquí debe mover de golpe limpo unha chapa de cada vez de xeito que:
1) avance sempre cara a canasta,
2) cada chapa que se desprace atravese a liña imaxinaria que se crea entre as outras dúas chapas e a supere sen bater nelas (para iniciación pode ser suficiente pasar entre ambas aínda que se bata nalgunha delas).
Se da atinado na canasta entre o maimiño e mailo furabolos, anótase un tanto. Se a chapa sae do taboleiro ou se realiza un movemento inválido, troca o turno.

Fichas de xogos: CARREIRAS ou CICLISMO

Nome: Carreiras ou Ciclismo.
Motivación: Xogos sinxelos, ecolóxicos e divertidos. Cunha simple presiña de chapas pódese xogar a ben distintos xogos.
Tipo de xogo: Sesións de práctica de move-la chapa co dedo, práctica de precisión na potencia e dirección, xogo básico, campionato.
Loxística: Podense empregar tódolos recursos que ofreza o medio: dende o tradicional xiz no chan ou camiño esgarabellado cun pauciño na terra, ate saltos por escaleiras, ou nunha sala grande ir ata unha boia e da-la volta, todo tipo de probas ou chegar a un punto dado dende unha distancia, por exemplo. Recomendable que logo dalgunhas propostas, @s participantes escollan a circuitometraxe.
Material: recursos do medio. Xiz.
Idade: A partir de 5 anos.

Nº Xogadoras/es: 2-5.

En circuítos longos e retortos, pódese xogar de distintas maneiras: en carreira individual ou en plan competición por equipas.
Hai regras que poden variar, por exemplo se unha chapa sae do circuito sinalado, pode:
a) volver ó inicio,
b) ficar onde saeu e perde un turno,
c) ficar onde estaba antes de se mover.

Cada circuíto e cada grupo de xogadores decidirán as súas regras.

Fichas de xogos: FUTEBOL

Nome: Futebol.
Motivación: Xogos sinxelos, ecolóxicos e divertidos. Cunha simple presiña de chapas pódese xogar a ben distintos xogos.
Tipo de xogo: Sesións de práctica de move-la chapa co dedo, práctica de precisión na potencia e dirección, xogo básico, campionato.
Loxística: Pódese curra-la escenografía (porterías, bandeirolas, gradas...) facéndoo máis bonito, aínda que non é imprescindible.
Material: Chapas machacadas ou outras pelotas, chapas para facer de porteiros, equipas de 6/10 chapas iguais ou parecidas, rectángulo -taboleiro ou chan- mínimo de 1/2 m de ancho.
Idade: A partir de 6 anos.
Nº Xogadores/as: 2

Nun rectángulo grande trazado no chan ou nun taboleiro imítanse os trazos dun campo de futebol. Dispóñense 6/10 chapas por equipa e máis un porteiro (que debe ser recoñecible). Cóllese unha pelota (por exemplo unha chapa cos cantos lixeiramente machacados ou de cava)e iníciase o xogo con movemento por turnos remedando na medida do posible o fútbol grande.
Cada xogador move unha chapa dun golpe limpo en cadaocasión, tanto pode petar na pelota como realizar movementos de tipo posicional. Pódese xogar por turnos simples ou por turnos con "posesión", que é cando unha chapa dun xogador ven de bater na pelota: nese turno/movemento @ contrincante non pode toca-la pelota -no caso de facelo incurriría en falta- e só si realizar movemento de tipo posicional ou defensivo.
En caso de que unha chapa saia por fóra de banda, deíxase onde está ou tráese á banda ficando inutilizable un turno. No caso de unha chapa saír trala liña de porta do atacante, retorna á liña de porta propia. No caso de a pelota saír por liña de banda, sitúase unha chapa da equipa que saca na banda e ambas equipas realicen a cadanseu movemento posicional.
En caso de córner sitúase unha chapa para o saque e realizan tres movementos posicionais ambas escadras. En caso de falta é potestade d@ defensor poñer barreira, e ademais realizan a cadanseus dous movementos. En caso de saque de porta pódense reorganizar a pracer as chapas todas polo campo.
O porteiro só pode xogar cando a pelota se atopa dentro da área grande e logo de se mover retorna á liña de gol.